話說8月中，奧運完結後有一位姑娘晚上send咗一篇好長嘅Msg同我分享一個故事，佢當時提及於護理中心有一班患有腦退化症嘅「老友記」，奧運期間每日早上9點都會準時睇直播支持香港隊，雖然佢哋當時唔記得香港運動員嘅名，但都為我哋一班香港代表打氣。最後奧運完結，佢哋竟然記得下屆奧運係「巴黎奧運」，記得我哋運動員嘅名。
當日睇完個msg真係好感動，冒昧之下問呢位叫Vicky嘅姑娘可唔可以比我去探吓呢班老人家，事隔一個月，喺Vicky幫忙下，今日終於去到呢間護理中心，探訪一班患有腦退化症嘅「老友記」，多謝你嘅協助。
雖然只係短短一個鐘，但可以同佢哋一齊唱吓歌仔、打吓波同玩吓遊戲，見到佢哋開懷大笑，我真心好好好開心🥰。佢哋好多都打得唔錯㗎，仲「殺咗」我幾球波添！
其實腦退化症係長者常見嘅腦部疾病，希望大家千祈唔好忽視身邊長者嘅健康。今日姑娘話腦退化症會令長者無故發脾氣，但大家記得唔好嫌得佢哋煩，應該多啲關心佢哋，因為呢啲情緒可能係患上腦退化症嘅症狀，大家只要早啲發現同正視問題，係絕對可以減輕症狀㗎！同時亦都希望香港可以有更多腦退化症護理中心，等更多患病嘅「老友記」可以得到治療、照顧及健康管理嘅機會。
今日仲應承咗呢班「大埔友」，下次贏到獎牌後會帶埋個牌去比佢哋睇，希望你哋都同我哋一齊努力每一天，戰勝病患。亦好感激一班姑娘每日細心照顧長者，你哋比運動員更厲害！💪致敬💯
#見到佢哋笑得開心
#我仲開心過佢哋
#希望佢哋身體健康
#我會努力去攞個牌俾你哋睇
Search